Старшыня райвыканкама: Да 1 мая ў Фаніпалі будзе завершаны ямачны рамонт
Ямачны рамонт у Фаніпалі будзе завершаны да 1 мая. Пра гэта распавёў старшыня Дзяржынскага райвыканкама Мікалай Арцюшкевіч падчас суботніка, які прайшоў на будаўнічай пляцоўцы новага дзіцячага саду.
- Там, дзе была перакладка цеплатрас, газон і дарожнае пакрыццё адновяць, - сказаў Мікалай Іванавіч. - У далейшым будзем займацца добраўпарадкаваннем прыдамавых тэрыторый. Працы неабходна правесці на 12 пляцоўках. Сюды ўваходзіць устаноўка бардзюраў, асфальтаванне двароў, павелічэнне колькасці парковачных месцаў. Усё гэта робіцца ў комплексе.
Тым не менш на рамонтныя работы могуць разлічваць далёка не ўсе жыхары шматпавярховак. У Фаніпалі большасць дамоў застаюцца кааператыўнымі, гэта значыць знаходзяцца пад прыватным кіраваннем. Таму займацца добраўпарадкаваннем гэтай тэрыторыі павінны самі жыхары на чале са старшынёй кааператыва. Райвыканкам не мае права ўкладаць у гэта бюджэтныя грошы.
Атрымліваецца, што нават ямачны рамонт у двары кааператыўнага дома павінны рабіць самі жыхары, наняўшы адпаведную арганізацыю.
Мікалай Арцюшкевіч таксама адзначыў, што работа па навядзенні парадку не сканчаецца толькі суботнікам. Яна будзе працягвацца на працягу ўсяго года.
- Мы павінны рабіць усё для зручнага пражывання грамадзян. Побач з садком, бачыце, возера. Вадаём таксама плануем добраўпарадкоўваць. Тут будзе зона адпачынку для мясцовых жыхароў, - тлумачыць старшыня райвыканкама.
Крыніца: Газета "Узвышша"
Каментарыі(5):